ألف مبروك ...سورية في المرتبة الثامنة على مستوى العالم ...كل العالم ...من حيث غلاء العقارات ...

مبروك ...إنجاز جديد يسجل لنا ...سورية تحتل المرتبة الثامنة على مستوى العالم من حيث غلاء العقارات ...كما ورد في بعض الإحصائيات ...

و في تبرير وزارة الإسكان ...قالت إن أحداً لم يأخذ رأيها بشأن تلك الإحصاءات لكانت أعطتهم الأسعار الصحيحة .. .

يعني ما في داعي ياخدوا رأيكن ...كل الناس بتعرف أسعار العقارات عنا ...و كل الناس بتعرف تحولها للدولار و تقارن مع الأسعار بالعالم ...

و أكيد لو أخدوا رأي وزارة ألأسكان كانت عطتهن سعر المتر عالعضم بألف و سعر المتر الجاهز بألفين ...!!!

المهم ...سعر المتر بسورية أغلى من سعر المتر بألمانيا ...و بالسويد ...و استراليا ...و عد إذا بتعد ...

مع أنو الراتب عنا أقل عشرين مرة تقريباً من الراتب بألمانيا و بالسويد و أستراليا ...

يعني الألماني براتبو العالي ما فيه يشتري عنا بيت لأنو غالي ...بس ما شاء الله الناس عنا بتشتري ...!!! لأ و بتدفع ضريبة رفاهية كمان ...

لهيك لما نقابة مقاولي البناء بتطلع لتبررر سعر المتر الغالي .؟..يعني شي بيضحك ...المتر يا حرام عم يكلفهن أكتر من ألمانيا ...بتعرف لأنو عم يحطولنا بمتر العضم و الجاهز ميزات لسا ما سمعت فيها ألمانيا ...

مثلاً عنا تقنية تسريب المجاري ...تقنية متطورة لم تصل إلى ألمانيا بعد ...

و تقنية الترطيب بالتنقيط ...و لا حتى بيعرفوها ..يعني الطابق الثالت بينقط على التانمي بلصيف فبيبورد ...

نحنا عنا هون مثلاً تقنية التندفئة بنقل الدخنة ...يعني المهندس اللي صمم بنايتنا ...عمل تقنية ممتازة ...فكسر المدخنة بالسقيفة ...لهيك كل ما شغل جيرانا قاظان الحمام ...بيصير بيتنا كلو دخنة ...و مو شوي ...كتير ...و هذا يعني الدفء في الشتاء ...
تقنية منع الضجة عالسطح ...لهيك مصمم بنايتنا شال درج السطح من أصلو مشان ما حدا يطلع عالسطح و يعمل ضجة ...

تقنية التواصل الحديث ..مصمموا حارتنا البرعين حطوا البعد بين البرندات شي متر أو مترين ...مشان التواصل الاجتماعي بين الأسر يكون عالي المستوى ..

تقنية التهوية بكسر الأوكورديون ...يعني إذا الدنيا صيف و جربت ترفع الأأبجور ...من أول رفعة بيطير ..., بيصير الهوا يفوت بحرية لتهوية البيت ...

تقنية تدريس الأولاد ...هي التقنية أبو ألمانيا ما بيسمع فيها لبعد يمكن مية سنة ...و إنت يمكن ما سمعت فيها لأنها تقنمية سرية خاصة فينا ...بنخهاف حدا يسرقهاتمنا ...فإنت بتتنعم بفوائدها بدون ما تعرفها ...الخلاصة إنو هالتقنية صممت خصيصاً لجعل الأأولاد يدرسون طوال اليوم ...كيف ...بعد إقامة أي ملاعب أو حدائق في الحارات ...و غذا بالغلط كان في حديقة أو ملعب بيطلعوا محلو بخمس بنايات ...فمنو أربح ..و منو بما أنو ما ضلل بالحارة إلا الشوارع و السيارات و الزفت ...فالولد ما فيه يلعب برا البيت ...و أهلو أكيد ما رح يخلوه ينزل على الشارع ...و رح يخلوه يضل بالبيت ليدرس ...و هيك بيتفوق بمدرستو...يعني تقنية سوبر مذهلة ...

من وين ألمانيا بدها تجيب هالتقنيات ...!!!

لهيك إذا المتر عنا غالي ...فهناك أسباب مقتعة ...